Në Klinikën e Pediatrisë, përkatësisht në Repartin e Hemato-Onkologjisë në Prishtinë, tash e 6 vite nuk është në funksion Aparati “Flow Cytometer”, i dhuruar si donacion nga shoqata “ Ndihmë fëmijëve me kancer”, aparat ky i cili ka funksion diagnostikimin e llojeve të sëmundjes së leukemisë.

Mos funksionimi i këtij aparati në kohën kur kemi numër të theksuar të sëmundjes së leukemisë diagnostikimi kryhet në qendrat shëndetësore jashtë Kosovës, ku sipas zyrtarëve të Shërbimit Spitalor dhe Klinik Universitar i Kosovës (SHSKUK) , është mungesa e kuadrit të specializuar për përdorimin e kësaj aparature, por edhe mungesa e materialit shpenzues, shkruan Kosova Post.

“ Aparatura për diagnostimkimin e sëmundjeve të leukemisë nuk është funksionale për shkak se nuk kemi profesionista për përdorimin e kësaj aparature. Në këtë drejtim tashmë kemi marrë masa konkrete dhe po punohet në trajnimin e stafit i cili do të punojë me këtë aparaturë e cila është e vendosur në Repartin e e Hemato-Onkologjisë në Klinikën e Pediatrisë. Kështu për momentin, dy specialistë mjekësor tashmë gjendën në Gracë të Austrisë për specializimin e përdorimit të aparaturës për diagnostikimin e sëmundjeve të leukemisë”, është deklaruar përmes postës elektronike për Kosova Post, zëdhënësi i SHSKUK-së Shpend Fazliu.

Sipas tij, për të qenë komplet në funksion aparati “Flow Cytometer”, duhet një staf i tërë, duke filluar nga mjekët e specializuar ashtu edhe stafi përcjellës.

“Për të punar më këtë aparaturë duhet të bëhet trajnimi i stafit i cili punon me të duke përfshirë mjekët dhe laborantët. Për momentin dy specialistë janë në Grac të Austrisë , do të qëndrojnë atje për trajnim 3 mujor, me mundësi të vazhdimit të këtij projekti deri në dy vite”, ka thënë Fazliu për Kosova Post.

Ndryshe, problem në vete përveç mungesës së stafit profesionalist për përdorimin e aparatit me të cilin diagnostifikohen llojet e leukemisë, është edhe mungesa e materialit shpenzues, apo reagensave.

Sipas zëdhënësit Fazliu, SHSKUK-ja nuk ka buxhet për blerjen e reagensave të aparatit diagnostifikues.

“Pra, si fazë e parë për të vu në funksion aparatin e diagnostikimit të leukemisë, ka qenë trajnimi i stafit adekuat, duke filluar me mjekët specialistë, pastaj edhe stafi i mesëm. Ndërsa edhe sa i përket sigurimit të reagensave do të punojmë në këtë drejtim edhe pse kostoja e blerjes së tyre është e pa përballueshme për buxhetin aktual të SHSKUK-së, për mallra dhe shërbime. Megjithatë besojmë se me rishikimin e buxhetit do të shihen mundësit buxhetore për sigurimin e reagensave që janë të domosdoshëm për aparatin i cili përdoret për diagnostikimin e llojeve të leukimisë”, është shprehur Fazliu.

Image result for shpend fazliu

Ndërkaq, lidhur me dërgimin e mostrave për diagnostikim të leukemisë jashtë vendit, Fazliu ka bërë të ditur se diagnostikimi i leukemisë jashtë Kosovës bëhet pa pagesë.

“Diagnostikimi i sëmundjeve të leukemisë për pacientët bëhet jashtë Kosovës. Deri më tani këto diagnostikime janë dërguar në Itali, kurse kohët e fundit analizat dërgohen në Austri, sepse Klinika e Pediatrisë është në projekte të vazhdueshme mbështetetje profesionale me mjekët nga Austria, Italia dhe Holanda, prandaj edhe analizat diagnostikuese janë të gjitha pa pagesë”, sqaron Fazliu për Kosova Post.